師虛人到中年棄商從武
少林、武當號稱武林兩大門派，早前《爽報》訪問了一名在少林學武的香港小子，回港後靠搬運風煤樽維生。報道一出，有位港女聯絡本報，替他不值，原來她是武當女俠，一手太極拳打得行雲流水，可惜香港武風不盛，她把心一橫開班授徒，對清貧學生更加分文不收，只求宣揚武學。
今年7月麥淑蓮便滿55歲，學武之心始於兒時，「細細個睇李小龍電影，好鍾意，但冇機會學，種子種喺心入面」。小學時期學過兩個月柔道，但開百貨店的爸爸着她多花功夫看舖，乖女只好暫別武學生涯。
其後仕途順暢，通用汽車在大陸設合資企業，員工過萬，副總經理及財務總監正是眼前這人，其後她更於英國上市公司UBM亞洲總部擔任業務發展總監。究竟職場女強人因何變身武林高手？「我做嘢時間比較長，希望搵人生另一個目標。我由細到大鍾意武術，只係以前屋企環境問題冇機會學」。
人到中年 毅然放棄事業家庭
當下請假一個月，跑到少林學外家拳，「我學少林拳、外家拳有限制，你叫我翻滾，我做唔到，撻咗落嚟未必能夠復元。作為興趣可以，但我想達到某個境界，所以要從新考慮學乜嘢，後來轉學太極」。
古代大俠散盡家財，行俠仗義，她也辭去UBM高職，行走江湖，「當時環境做又得，唔做又得，希望追求自己興趣，因為粒種子一直喺我心入面」。真係多得呢粒種子唔少，「首先我要放棄份唔錯嘅工作，第二雖然我冇仔女，但我要放低屋企、所有親戚朋友。首先要學識放低，放低對我嚟講係一個好高嘅門檻，因為要放棄收入、事業，意思係將來唔再用以前嘅專業謀生」。
太極始祖，一說陳家溝陳王廷，一說武當張三丰，她在2009年到河南陳家溝敲門，「我以為武當係金庸小說裏面嘅橋段，我好膚淺，唔識」。每日上課六小時，她課外加操，日練七、八小時視作等閒，「對我咁嘅年紀嚟講……我又ok喎！」
要命的是當地生活習慣，「嗰度生活除咗練武，就係練武，乜嘢都冇，好枯燥」。飲食如何？「一個星期有兩、三日有肉，點樣嘅肉？你要用放大鏡撥草尋蛇，可能搵到幾條；綠色蔬菜好少，因為貴，瓜果比較多，來來去去嗰幾種，基本上冇乜烹調技巧可言，大鑊飯掟晒落去」。
在陳家溝待了一年，才到湖北武當山，拜三丰派第14代掌門鍾雲龍道長為師，道號師虛，「一去到差唔多吵大鑊，佢哋又話唔要我，我又想劈炮即刻走！」原來武當門規極嚴，「師父行前你行後，師父未坐低你唔准坐，唔准駁咀，唔准問點解，但我最鍾意問嘢，十萬個為甚麼嗰種，我一時間接受唔到。你話師父行前你行後，呢啲小意思，但你唔准我問嘢喎！」猶幸雙方各讓一步，她留下來。
練武方面，男女弟子一視同仁，「唔理（女人）嗰幾日方唔方便，假設你需要自衞，你會唔會話：『我呢幾日唔方便，你過幾日先嚟打劫我啦！』」拳來腳往，難免有肌膚接觸，「唔理㗎喇，照打，雖然佢（師傅）知道我係女人，但練起武上嚟唔計較得咁多，但佢唔會揸你，你估好似周星馳咁咩！」
師虛是否班上最老的一個？「差唔多，但我唔係成績最差嗰個！」她以學武經歷寄語世人，追求夢想第一課，永不怕遲，「你永遠唔好話畀自己聽太遲，40幾歲學武遲唔遲？一般人嚟講肯定遲，但一樣練到出嚟！」第二課，學會放下，「要學識有得必有失，永遠唔會兩者兼得，我唔會有以前嘅事業，又有両家嘅愛好」。
道士可娶妻 地位越高要戒色
不到武當，不知道士可以飲酒，但只限淺酌；更可娶妻，然而地位崇高的道長大多守身養氣，「一般情況下，越高身份越戒色」。那麼妻子怎辦？「好似我師娘唔住學校，我師傅住喺學校，師娘日間嚟幫手，黃昏就要走」。
道士只許自己習武，不跟妻子「練功」，「做得高層次道士嘅老婆好難忍受，第一就係你頭先講嗰樣嘢，第二，佢哋唔會帶家眷出席（公開場合），就算同場出席，道長坐主家席，家眷敬陪末席」。她寄予無限同情：「作為道士老婆，無論生活上或協調上都忍唔到，冇幾耐就走，頂唔順，因為家庭生活少，家庭生活唔止房中事，街上永遠唔會拖手、搭膊頭」。
因此道士離婚率頗高，「如果我係道士老婆，已經忍唔到」。既然如此，道士何必娶妻？「道士都有情慾，有感情，仲有好多仰慕佢哋嘅人」。師虛分享這段，只想向道士的另一半致敬：「德高望重道士嘅老婆，我好尊重佢哋，因為佢哋好忍得，修為一樣好高！」
共花40多萬 免費教清貧學生
埋單計數，她在陳家溝及武當山共花了40多萬學費及生活費，「武當山唔算最貴，陳家溝仲貴，港澳台納入外國人收費，短期課程本地人1,000蚊（人民幣），外國人1,000蚊美金！」丈夫可有怨言？「咁啲錢係我㗎嘛！」
她立志在港推廣武術，爭取太極成為中、小學必修科，目前在深水埗街坊福利會小學教幾十名清貧學生打太極，歡迎有志者跟她學武，「清貧朋友我完全唔收費，無論陳式或武當（太極），我都好樂意教，只要佢係清貧」。看來那40多萬回本無期，「賺得返就好，賺唔返都冇所謂」。
註:40萬港幣折新台幣約160萬
。。。。。。。。。。。。。。。。。。。。。。。。。。。。。。。。。。。。。。
這段報導是舊聞，不過小貓讀後有感而發，故轉載與大家分享，報導以廣東話寫成，希望諸位能看明白吧!
能夠放下身邊一切去習武，小貓不能不佩服，更配佩服她家人對她的包容和諒解。小貓習武素來是那種喜歡尋根究底，也就是十萬個為什麼的那類人。習武，不去問“為什麼”的人很難進步和突破。小貓不相信不求甚解，盲目地去反覆練習就能把拳術練得好。這些都是中了“拳打萬遍，神理自現”的毒。當然任何的技藝都必須經過反覆不斷的練習才能掌握，武術尤其如是。
有很多時候即使明白了拳理，經過反覆不斷的練習，但身體卻怎樣也做不來，那種苦惱的滋味相信不少武者都會嚐試過。反之，經過多次練習後而成功，那種喜悅相信每個武者也會記得。
或許，就如人生一樣，我們都應該着眼於過程而不是結果……
留言列表
